मुंबई: कोकण रेल्वे कॉर्पोरेशन लिमिटेड (KRCL) ने प्रवाशांसाठी एक महत्त्वपूर्ण घोषणा केली आहे. कोलाड (महाराष्ट्र) आणि वेर्णा (गोवा) दरम्यान नुकत्याच सुरू झालेल्या ‘रो-रो’ (रोल-ऑन, रोल-ऑफ) कार वाहतूक सेवेमध्ये आता नांदगाव रोड स्टेशनचाही समावेश करण्यात आला आहे. प्रवाशांच्या मागणीनुसार हा नवा थांबा सुरू करण्यात आल्याने महाराष्ट्रातील किनारपट्टीवर प्रवास करणाऱ्या कार मालकांसाठी मोठा फायदा होणार आहे. या निर्णयामुळे प्रवाशांना नांदगाव रोड स्टेशनवर आपली गाडी लोड किंवा अनलोड करण्याची सुविधा मिळणार आहे.
सुधारित वेळापत्रक आणि दर
कोकण रेल्वेने ‘रो-रो’ सेवेसाठीचे सुधारित वेळापत्रक आणि मालवाहतूक शुल्क जाहीर केले आहे. कोलाड ते वेर्णा प्रवासासाठी ट्रेन पहिल्या दिवशी दुपारी ३:०० वाजता सुटेल आणि नांदगाव रोडला रात्री १०:०० वाजता पोचेल, तर दुसऱ्या दिवशी सकाळी ६:०० वाजता ती वेर्णाला पोचेल. वेर्णा ते कोलाड प्रवासासाठी, ट्रेन वेर्णा येथून दुपारी ३:०० वाजता सुटेल आणि दुसऱ्या दिवशी सकाळी ६:०० वाजता कोलाडला पोचेल.
या सेवेसाठी मालवाहतूक शुल्काची माहिती देताना, कोकण रेल्वेने सांगितले की, कोलाड ते वेर्णा प्रवासासाठी प्रति कार ₹७,८७५/- (५% जीएसटीसह) आणि कोलाड ते नांदगावसाठी ₹५,४६०/- (जीएसटीसह) शुल्क आकारले जाईल. प्रत्येक बुकिंगसाठी ₹४,०००/- नोंदणी शुल्क (५% जीएसटीसह) भरावे लागेल आणि उर्वरित रक्कम प्रवासाच्या दिवशी स्टेशनवर जमा करावी लागेल. प्रत्येक सेवेत ४० गाड्यांची क्षमता असून, बुकिंगची अंतिम मुदत १८ ऑगस्ट, २०२५ पर्यंत वाढवण्यात आली आहे. जर प्रति ट्रिप १६ पेक्षा कमी गाड्यांचे बुकिंग झाले तर सेवा रद्द होईल आणि नोंदणी शुल्क परत केले जाईल.
प्रवाशांसाठी महत्त्वाचे नियम
या सेवेच्या नियमांनुसार, गाडी ‘रो-रो’ ट्रेनमध्ये लोड झाल्यावर चालक किंवा सह-प्रवाशांना गाडीत प्रवास करण्याची परवानगी नाही. प्रवाशांना ट्रेनशी जोडलेल्या ३एसी (3AC) आणि २एस (2S) डब्यांमध्ये तिकीट काढून प्रवास करणे अनिवार्य आहे. प्रत्येक कार बुकिंगवर जास्तीत जास्त ३ प्रवाशांना परवानगी असेल. नोंदणीसाठी, प्रवाशांनी कोलाडसाठी नवी मुंबईतील कार्यालय, वेर्णासाठी वेर्णा रेल्वे स्टेशन आणि नांदगावसाठी कणकवली स्टेशनवर संपर्क साधावा. अधिक माहितीसाठी कोकण रेल्वेच्या अधिकृत वेबसाइटला (www.konkanrailway.com) भेट देण्याचे आवाहन करण्यात आले आहे.
कोकण रेल्वेच्या ‘रो-रो’ सेवेला नांदगाव रोडचा नवा थांबा
