चिपळूण : चिपळूण शहर स्वच्छ ठेवणे आणि नागरिकांना स्वच्छ व मुबलक पाणीपुरवठा करणे, हे ध्येय डोळ्यासमोर ठेवून नगराध्यक्ष उमेश सकपाळ यांनी गुरुवारी सकाळी ग्रॅव्हिटी पाणी योजनेची प्रत्यक्ष पाहणी केली. पावसाळ्यापूर्वी ही पाणी योजना पूर्ण करून चिपळूणवासीयांना स्वच्छ पाणी देण्यासाठी आपण शंभर टक्के प्रयत्न करू, असा विश्वास त्यांनी यावेळी व्यक्त केला. गुरुवारी सकाळी सुमारे १० वाजता नगराध्यक्ष उमेश सकपाळ, नगरसेवक उदय जुवळे, शिवसेना उपशहरप्रमुख सुयोग चव्हाण यांच्यासह कोळकेवाडी धरण परिसरात दाखल झाले. या ठिकाणी चिपळूण शहरासाठी ठेवण्यात आलेल्या टॅबची त्यांनी पाहणी केली. या वेळी नगर परिषदेच्या पाणीपुरवठा विभागाचे अभियंता रोहित खाडे, श्रमगाथा असोसिएट्स आणि प्रगती कन्स्ट्रक्शनचे ठेकेदार प्रमोद आवले, विनोद पाटकर, प्रकल्प सल्लागार अभियंता सचिन क्षीरसागर, तसेच कंपनीची तांत्रिक टीम उपस्थित होती.
धरण परिसरात सुरू असलेल्या पाईपलाईनच्या कामाची पाहणी करताना पिंपळी येथील आरटीओ व वनविभागाच्या जागेमुळे काही अडचणी निर्माण झाल्याचे निदर्शनास आले. या ठिकाणी पाईपलाईनला थोडेसे वळण द्यावे लागणार असून, पाण्याचा दाब कमी होऊ नये, यासाठी योग्य मार्ग काढण्यात येईल. याबाबत पालकमंत्र्यांशी चर्चा करून तोडगा काढू, असे नगराध्यक्षांनी ठेकेदार कंपनीला स्पष्ट केले.
या वेळी नगराध्यक्ष उमेश सकपाळ यांनी ठेकेदारांना दर्जेदार काम, उत्तम प्रतीचे पाईप व साहित्य वापरण्याच्या स्पष्ट सूचना दिल्या. पावसाळ्यापूर्वी हे काम पूर्ण करण्यासाठी शक्य ते सर्व प्रयत्न करा, पावसाळ्यापूर्वीच ग्रॅव्हिटी योजनेतून चिपळूणवासीयांना स्वच्छ पाणी दिले जाईल, असा निर्धार त्यांनी व्यक्त केला. याला ठेकेदार कंपनीनेही सर्वतोपरी सहकार्य करण्याची ग्वाही दिली.
काम करताना ठेकेदारांना येणाऱ्या अडचणी नगराध्यक्षांनी समजून घेतल्या व त्यावर मार्गदर्शन केले. ज्या पद्धतीने काम व्हायला हवे, त्या पद्धतीच्या स्पष्ट सूचना त्यांनी दिल्या. या वेळी जिल्हा परिषदेचे माजी सदस्य विनोद झगडे हेही उपस्थित होते. त्यांनी काही सूचना मांडल्या.
या प्रकल्पातील तांत्रिक अडचणी सोडवण्यासाठी जलसंपदा विभागाचे अभियंता श्री. रासनकर यांची भेट घेण्यात येईल, तसेच लवकरच त्यांच्या उपस्थितीत बैठक आयोजित करण्याच्या सूचना नगराध्यक्ष उमेश सकपाळ यांनी दिल्या.
पावसाळ्यापूर्वी ग्रॅव्हिटी पाणी योजना पूर्ण करण्यासाठी शंभर टक्के प्रयत्न :नगराध्यक्ष उमेश सकपाळ
